NARESH - 03/05/1955

૭૩ આયર્ન રોડ, મુંબઇ ૨૨. ૩-૫-૫૫.

પ્રિય હેમેન્દ્ર,

તારો અણધાર્યો પત્ર મળ્યો વાંચી ખૂબ જ આનંદ થયો અને મને જે શંકા હતી કે તું આપણું સર્જેલ સબબ વિસરી ગયો લાગે છે તે ખોટી પડી. મને તો તે વિચારોએ હમણાં હમણાં તંગ કરી મુક્યો છે. કારણ ૧૦-૧૫ દિવસ પહેલાં જ મેં બે Ceylon ના આપણી જ ઉંમરના છોકરાઓને સાયકલ પર જતા જોયાં અને તેમની સાયકલ પર પાછળ નાનકડી પેટી પર લખ્યું હતું 'Ceylon To London' અને આગળ Bar ઉપર આપણો તથા તેઓનો નાનો ઝંડો હતો. આ દ્રશ્ય જોઇને મનમાં જ વિચારો સ્ફુર્યા કે માનવીની ખરી ધગશ હોય તો તે શું નથી કરી શકતો.

ઇંગ્લીશમાં કહે છે ને કે "Where there is a will there a way". હજુ પરમ દિવસે જ બીજા એક European ને ચર્ચગેટ સ્ટેશન પાસે જોયો કે જેની આસપાસ ઘણા જ માણસો ટોળે વળ્યાં હતાં મેં પણ નજર કરી જોઇ તો તે World Tour પર નીકળ્યો હોય તેવું લાગ્યું. તેની Motor Cycle પર સામાન અને જરૂરી ચીજો સુંદર રીતે ગોઠવી હતી. એકલો જ નીકળી પડ્યો છે ને ? ફક્ત સાથીદાર માં તેની એક Motor Cycle જ. આવા તો કેટલાય આપણા જેવા વિચારો અને ઇચ્છાવાળા માણસો આ દુનિયા પર રખડતા

 

હશે. અને કુદરત સાથ આપશે તો આપણે પણ થોડા જ તેમની જેમ નીકળી પડીશું. એકવાત તો ચોક્કસ લાગે છે કે અમેરિકા જો ધંધા કે નોકરીના ચગડોળમાં ફસાયા તો પછી તેમાંથી નીકળવું ખૂબ જ ભારે છે. માટે હવે ટાઇમ ખૂબ જ ભરાઇ ગયો છે વિચાર કરીને તરત તેનો અમલ જ કરવો જોઇએ.

હું તો અહીં જ રહેવાનો છું. કંઇ પણ જવા વિચાર નથી. તારા માટે તો મને પોતાને લાગે છે કે જમશેદપુર જ સારા chances છે. મુંબઇમાં આવો સારો chance મળે નહિ.

આજકાલ બીજો એક પણ વિચાર મારા મગજમાં ભમ્યા કરે છે ક્યારે હવે હું કાંઇ પૈસા મેળવતો થાઉં. કોઇની સહાય દ્વારા કાંઇ પણ નાનું મોટું કામ કરવાની ઇચ્છા થઇ આવે છે. પણ હાલ મિત્રોમાં એક રસિક કોઠારી અને બીજો મહેન્દ્ર શાહ જ છે તેમાં મહેન્દ્ર તો ઓફીસે જાય છે અને તે વકીલાત જ કરવાનો એટલે તેને વેપાર - ધંધા કે બીજી એવી કોઇ વાતમાં રસ જ ન હોય જ્યારે રસિકને તો મેં ઘણા વખતથી કહી રાખ્યું છે કે આપણા માટે કોઇ લાઇન શોધ પણ તે હજુ સુધી તેમાંથી સફળ થયો નથી. મારી પોતાની પાસે તો એક વિચાર છે પણ તે વિચાર સાંભળીને કોઇ પણ જરૂર હસશે જ. પણ હું માનું છું કે જો નસીબજોર કરતા હશે તો મારા વિચાર દ્વારા સારા પૈસા મળે તેમ છે. તેને માટે જરા

 

મહેનતુ માણસની જરૂર પડે પણ તે તો મળી રહેશે.

બનતા સુધી આ મહિનાની ૧૫-૧૬ તારીખે મારે સુરેન્દ્રનગર તરફ આવવાનું થશે. જો કે મારાથી બનશે ત્યાં સુધી તો હું ત્યાં આવવાનું Avoid જ કરીશ પરંતુ નહિ ચાલે તો પછી આવવું જ પડશે. મારા પૂ. નાનાકાકાના સાળાના લગ્ન છે તે માટે કદાચ ધ્રાંગધ્રા જવું પડે. તેઓ આડું ખાઇને પાછળ લાગ્યા છે કે આવવું જ પડશે ખેર જોઇએ છીએ આગળ પર શું થાય છે.

હમણાં જ તારા પત્રની શરૂઆત પહેલાં જ પૂ. કાકાને પત્ર લખ્યો છે. તે તો કદાચ લખી પણ નાખ્યો હશે. નવીનમાં પન્નાના લગ્ન આવતી કાલે છે કંકોત્રી આવી છે એટલે નિરાશ તો નહિ જ કરી શકાય એટલે જવું તો પડશે જ. જર્મનીનું એડ્રેસ મારી પાસેથી લઇ ગયા હતાં એટલે પૂ. કાકાને પણ લખી જ હશે. કાકા હમણાં લગભગ એક મહિનો Bayer ની factory માં કામ શીખવા ગયા હતાં. Lodging and Boarding free આપે છે. અત્યારે કાકા હૈડલબર્ગમાં છે. મજા કરે છે.

તારી પરીક્ષા ૬ તારીખે પતે પછી અહીં આવવાનું કરજે અને પછી અહીં થોડા દિવસ રહીને વાડિયા જજે. હમણાં ટ્રેનોમાં ગીર્દી પણ સખત રહે છે એટલે અગાઉથી જગા મળવી પણ મુશ્કેલ છે. તો જરૂર

 

આવવાનું કરજે.

મારી પરીક્ષા ગયા શનિવારે જ પતી ગઇ છે. Practicals સારા ગયા છે અને Theory માં એક પેપર સીવાય બીજા સારાં ગયા છે. પાસ થવાની આશા તો ચોક્કસ છે જ પછી તો જેવા નસીબ.

હાલ એજ પત્રનો જવાબ તુરત આપજે. તારી તૈયારીઓ આપણે કઇ રીતે કરવી તેની રૂપરેખા જરૂર મને જણાવજે. મને તો લાગે છે રૂપરેખા તૈયાર કરવી સહેલ છે પણ M vitamin કઇ રીતે મેળવવું તેની જ વિચારણા કરવી અઘરી છે. - એજ તું મનમાં ધારીશ. મારા પૂ. માતુશ્રીએ યાદી લખાવી છે. આ તરફ આવવાનું જરૂર કરજે. તારે ઘણાંઓને મળવાનું ગઇ વખતે બાકી રહી ગયું હતું તે આ વખતે પતાવી દેશું !

એજ

લિ. રમેશ